Andiko: Yohana 7:37: “Siku ya mwisho ya sikukuu, siku ile kubwa, Yesu akasimama, akapaza sauti yake akisema, Mtu akiona kiu, na aje kwangu anywe.” Ninaomba maisha yenu yajazwe upendo na baraka za Mungu.

Leo ningependa kushiriki nanyi neema kupitia ujumbe wenye kichwa “Kiu ya Kiroho.” Ikiwa hujala chochote kwa siku kadhaa na ukapata jiwe la thamani sana jangwani, je, ungefurahia jiwe hilo la gharama kubwa? Jiwe hilo lina faida gani ukifa kwa njaa? Ni kwa sababu chakula na kinywaji ndizo mahitaji muhimu zaidi kwako.

Ndivyo ilivyo katika imani. Kama Mathayo 5:6 inavyosema, “Heri wenye njaa na kiu ya haki; maana hao watashibishwa,” ukiwa na njaa na kiu ya haki ya Mungu kwa dhati, utashibishwa. Kamusi ya Webster inafafanua “kuwa mwenye haki” kuwa “kutenda kulingana na sheria ya Mungu au maadili” au “kutokuwa na hatia wala dhambi.”

Haki ya kiroho inayotambuliwa na Mungu hutimizwa unapofuata mapenzi yake; inajumuisha kila jambo unalopaswa kufanya hadi utakapotakaswa. Ukiwa na kiu ya kutimiza haki ya Mungu, utatambuliwa kuwa na imani na tumaini la mbinguni, na utatamani kutakaswa mbele za Mungu, kuufanana moyo wa Bwana na kushiriki katika asili ya Mungu. Kisha utapokea baraka na kushibishwa rohoni.

Ili kushibishwa rohoni, unapaswa kuujaza moyo wako kwa chakula cha kiroho. Chakula hicho ni nini? Yesu alisema katika Yohana 6:55, “Maana mwili wangu ni chakula cha kweli, na damu yangu ni kinywaji cha kweli.” Kwa kifupi, Yesu ndiye chakula chetu cha kweli. Yeye ndiye Neno aliyefanyika mwili na kuja duniani. Kwa hiyo, unapolisikiliza na kulitenda Neno la Mungu kwa bidii, roho yako itajazwa chakula cha kiroho.

Kadiri unavyolishika na kulitenda Neno la kweli, ndivyo Mungu wetu atakavyokupa nguvu na mamlaka zaidi. Kwa nguvu na mamlaka hayo unaweza kumtawala adui Ibilisi na Shetani na kuwa na ushirika wa kina na Mungu, ili ufanikiwe katika kila jambo. Zaidi ya hayo, unaweza kugundua dhambi na uovu na kuvitupa upesi ili utakaswe. Mungu wetu atafurahi na kusema, “Nikutendee nini? Niombe lolote unalotaka.”

Hatakupa tu baraka ya afya njema na mafanikio ya kifedha, bali pia atakuwezesha kutimiza kazi ya Ufalme wa Mungu kwa kiwango cha juu na kukuongoza uketi katika nafasi yenye utukufu mbinguni.

Kwa hiyo, kama ilivyoandikwa katika Mathayo 4:4, “Mtu hataishi kwa mkate tu, ila kwa kila neno litokalo katika kinywa cha Mungu,” ninaomba kila mmoja wenu atamani mambo ya kweli na ya kiroho na ajilishe mkate wake wa kiroho kwa Neno la Mungu. Ninaomba haya katika jina la Bwana wetu Yesu Kristo!

    His Emeritus Bishop Dr. Jaerock Lee